Konkurslógin verður broytt

Reglur um, hvussu berast skal at, tá eitt felag skal endureisast fíggjarliga, koma nú í Føroyum.

Konkurslógin, sum er donsk, skal broytast.

Endamálið við endurreising er saman við Skiftirættinum og kreditorunum at fáa búskapin í einum kreppuraktum felagi á beint, so tað aftur verður solvent. 

Um tað ikki eydnast, verður felagið trotabúgv.

Trotabúsbann

Reglur koma eisini um trotabúsbann. Trotabúsbann er bann fyri at vera í leiðsluni í einum felagi við avmarkaðari ábyrgd, tað er smápartafelagi ella partafelagi. 

Trotabúsbann kann verða álagt fólki, sum hava ført grovt skilaleysa virkisleiðslu. Gildistíðin fyri eitt trotabúsbann er í fyrsta umfari trý ár.

Landsstýrið hevur biðið danska løgmálaráðið broyta og samanskriva konkurslógina, sum er galdandi í Føroyum.

Uppskotið er nú til hoyringar. Uppskotið skal síðani í løgtingið.