Niðurstøða: Løgreglan ikki veruliga fyrireikað

Kongresspolitiið í USA var ikki veruliga fyrireikað, tá ið viðhaldsfólk hjá Trump lupu á stjórnarbygningin í Washington D.C. í januar í ár.

Tað er niðurstøðan í eini frágreiðing frá Senatinum um álopið, sum kostaði fimm fólkum lívið, millum annað einum løgreglufólki.

Fleiri feilir gjørdir

Sambært Ritzau stendur í frágreiðingini, at fleiri feilir vóru gjørdir. Millum annað var ov lítið av samskifti, og eingin verulig ætlan varð løgd at steðga álopinum.

Í frágreiðingini verður eisini funnist at, at fregnartænastan áðrenn álopið ikki tók hóttanina í álvara, hóast tíðindin gingu á sosialum miðlum, at stuðlarnir hjá Trump fóru at royna at koma inn í Kongressbygningin, millum annað gjøgnum tunlar undir Kongressini.

Frágreiðingin kemur, eftir at Senatið í mai atkvøddi fyri at fáa eina óhefta kanning um álopið.