Eingi landafrøðilig atlit, tá makrelkvotur verða latnar

Makrelkvotur verða ikki grundaðar á landafrøðiligt atlit.

Undanfarna samgonga brúkti hetta atlitið, tá menningarkvotur vórðu latnar, men verandi samgonga hevur tikið ta skipanina av.

Tað sigur Jacob Vestergaard, landsstýrismaður, í svari til Páll á Reynatúgvu, løgtingsmann, sum spurdi, hvat grundarlag verður brúkt at býta út tey 60.000 tonsini, sum makrelkvotan er vaksin.

Hann spurdi eisini, um landsstýrismaðurin ætlar at luta út kvotur til fiskivinnuverkætlanir í Sandoynni, Norðstreymi og Suðurstreymi, nú kvotaparturin hækkar.

Vinnuligar royndir og verkætlanir

Jacob Vestergaard sigur, at hann hevur gjørt av, at meginparturin av tí, sum makrelkvotan er vaksin, verður latin í sama lutfalli millum skipabólkarnar, sum makrelkvotan hevur verið latin eftir seinastu árini.

Ein partur verður sambært sjófeingislógini tó settur av til vinnuligar royndir og verkætlanir, bæði til skipakeyp og ískoytiskvotur til rakstur av verandi skipum.

Tað ber til hjá persónum og feløgum um alt landið, á jøvnum føti, at søkja um at fáa burtur av hesum partinum av makrelkvotuni, sigur Jacob vestergaard í svarinum til Páll á Reynatúgvu.