Funnin sekur í at hava dripið Pidda

Klokkan 22:08 í kvøld byrjaði orðførarin hjá nevningatinginum at lesa upp úrskurðirnar hjá nevningatinginum í Føroya Rætti. 24 minuttir seinni, klokkan 22:32, kom úrskurðurin, sum øll hava bíðað eftir.

 

Tann ákærdi, ein nú 33-ára gamal kroati, er sekur í at hava myrt Dánjal Petur Hansen, vanliga nevndur Piddi, var úrskurðurin hjá nevningatinginum í størsta drápsrættarmálinum í føroysku rættarsøguni.

 

Umframt at tann ákærdi varð dømdur sekur í at hava tikið Dánjal Petur Hansen av døgum, varð tann ákærdi eisini funnin sekur í seks øðrum ákærupunktum, ið fevna um svik og skjalafalsan.

 

 

 

Hóast nevningatingið fann 33-ára gamla kroatan sekan í at hava myrt Dánjal Petur Hansen, so tók rætturin í kvøld onga støðu til, hvussu hørð fongsulsrevsingin í málinum skal verða.

 

Hósdagin skulu nevningatingið og rætturin taka støðu til, hvussu langa fongsulsrevsing 33-ára gamli maðurin skal hava, nú tá maðurin er funnin sekur í at hava myrt Dánjal Petur Hansen, vanliga nevndur Piddi.

 

Ákærin, Linda Hesselberg, sigur við Kringvarpið, at ákæruvaldið í minsta lagi fer at krevja tann 33-ára gamla kroatan dømdan í fongsul í 12 ár. Harumframt fer ákæruvaldið at krevja, at maðurin verður vístur úr Føroyum fyri alla tíð.