Hava fiskað 55.000 tons av makrelkvotuni

Til á midnátt fríggjadagin vóru fiskað 55.000 tons av føroysku makrelkvotuni, helvt um helvt í føroyskum sjógvi og altjóða sjógvi.

Føroyska makrelkvotan er 167.000 tons í ár.

Í løtuni eru skipini í altjóða sjógvi, beint norðan fyri føroyska markið.

Sleppa ikki í norskan sjógv

Føroysku skipini sleppa ikki enn í norskan sjógv, tí kunngerðin um atgongd í norskan sjógv er ikki lýst enn.

Føroyar og Noreg gjørdu 16. juli avtalu um makrelin í norskum sjógvi og í føroyskum sjógvi. 

Við avtaluni fingu Føroyar møguleikan at fiska helmingin av føroysku makrelkvotuni í ár í norskum sjógvi. Talan er um 83.524 tons.

Og Noreg fekk rætt til at fiska somu nøgd í føroyskum sjógvi.