Keypa nógv meira í Rúsuni

Rúsdrekkasøla landsins seldi nógv meira í fjør enn hini árini, Rúsan hevur verið til. Hon byrjaði í 1992.

Sølan í fjør var 4,2 mió. kr. størri enn í 2019 og næstan 10 milliónir størri enn í 2018.

Orsøkin er, sigur Rúsdrekkasølan í ársfrágreiðingini fyri 2020, fólkatilflytingin og sera góður samfelagsbúskapur.

Rúsdrekkasølan seldi fyri góðar 145,7 mió. kr. í fjør.

Drekka øðrvísi

Seinastu tíggju árini hevur umsetningurin hjá Rúsdrekkasøluni verið millum 117 og 145 mió. kr. um árið.

Síðani rúsdrekkasølan kom, eru føroyingar farnir at drekka øðrvísi. Minni spiritus verður drukkið, og yvirhøvur drekka fólk minni reint alkohol nú.

Nú keypa fólk meira vín og øl og minni brennivín.

Miðal alkoholstyrkin minkaði úr 20,6 prosentum í 1992 niður í 9,8 prosent í 2020

Nýtslan í 1992 var 8,8 litrar av reinum alkoholi fyri hvørt fólkið, 15 ár og eldri. Í 2020 var hon 6,5 litrar. 

Tá er tað tollfría ikki talt við. Tann sølan var 1,6 litrar fyri fólkið í 2019 og 0,9 í 2020.

Tollfría sølan vaksin

Tollfría sølan er nógv vaksin.

Seinastu 10 árini er tann sølan vaksin stív 80 prosent.  Men sølan innanlands hjá Rúsini er bara vaksin 12 prosent. 

Í 2020 keyptu fólk tó meira innanlands og nógv minni tollfrítt.

Orsøkin er ferðaavmarkingar í sambandi við koronu.