Jeff Bezos er ríkasti amerikanari í løtuni

Jeff Bezos er ríkasti amerikanari í løtuni, sigur Forbes Magazine.

Bezos, sum í 1994 stovnaði nethandilin Amazon, er ovastur á listanum yvir ríkar amerikanarar. Hetta er fjórða árið á rað, at Jeff Bezos er ríkasti persónur í USA. 

Honum á baki koma Elon Musk, Mark Zuckerberg og Bill Gates.

Alice Walton ríkasta kvinnan

Ríkasta kvinna í USA er sambært Forbes Magazine Alice Walton. Hon er dóttir Sam Walton, sum stovnaði handilsketuna Walmart, og er á 12. plássi á listanum hjá Forbes.

400 fólk eru á listanum hjá Forbes Magazine, og 14 prosent av hesum eru kvinnur.

Merkisvert er, at fyrrverandi amerikanski forsetin, Donald Trump, er ikki á listanum. Tað er fyrstu ferð í 25 ár, at Donald Trump ikki er millum 400 tey ríkastu fólkini í USA. Heldur ikki kendi sjónvarpsverturin, Oprah Winfrey, telist longur millum tey 400 ríkastu í USA.