Stórt rúsevnismál fyri rættin

Føroya rættur fer hesa vikuna at viðgera enn eitt stórt rúsevnismál.

Tveir menn eru ákærdir fyri at hava 1590 gramm av amfetamini, 177 gramm av ketamini og 406 gramm av hashi, sum sambært ákæruritinum var ætlanin at selja.

Hetta var fyri 8.januar í ár.

Hevði avsagaða byrsu

Annar maðurin er eisini ákærdur fyri seks onnur lógarbrot.

Hann er ákærdur fyri at sláa ein politist so illa, at politisturin fekk skaða.

Hann er ákærdur fyri at hava undir hond 28,4 gramm av amfetamini og 0,72 gramm av evninum C-B.  

Maðurin er ákærdur fyri hava eina avsagaða byrsu, 14 høglpatrónir og ein springknív.

Ein ørgrynna av rúsevnum

Og ein ákæra umfatar nógv rúsevni, 7,46 gramm av amfetamini, 3,37 gramm av psi locybinsoppum, 1,8 gramm av MDMA, 48,4 gramm av ketamini, eina ADHD tablett, 1,05 gramm kokain og 0,35 gramm av hashi.

Seinasta ákæra er um, at maðurin í summar skal hava av órøttum havt eina fartelefon í varðhaldinum í Mjørkadali.

Ákæruvaldið krevur, at vápnini, rúsevnini og fartelefonin, sum eru nevnd í ákæruritinum, verða drigin inn.