Flokkurin fór um mark

-Surrealistiskt og kaotiskt. Tað sigur Annika Olsen um tað, sum hendi í Løgtinginum í dag.

Hon fer ikki at melda seg úr Fólkaflokkinum, sum fór so langt sum at umskipa landsstýrið fyri at fáa hana út úr tingsalinum í dag.

Royndin miseydnaðist, tí partamaður hennara, Heðin Zachariasen, fór í farloyvi fyri at Annika Olsen harvið kundi fáa sætið aftur á tingi.

-Flokkurin fór um mark fyri tí, sum eg kann standa inni fyri, sigur Heðin Zachariasen um sína avgerð.

Sambært Heðini Zachariasen hevði hann gjørt sína støðu púra greiða fyri Fólkaflokkinum, áðrenn Jacob Vestergaard og Elsebeth Mercedis Gunnleygsdóttur fóru úr landsstýrinum og aftur í løgtingið.