Lagnufundur í samgonguni í dag

Greitt er, at samgongan í løtuni bert hevur stuðul frá 16 av 33 tingfólkum, eftir at Johan Dahl úr Sambandsflokkinum tók seg úr samgonguni, tá ið málið um sammøður varð samtykt í farnu viku.

Hetta stendur Johan Dahl framvegis við, segði hann við Dag og viku í gjárkvøldið.

Lagnan hjá samgonguni kann tískil verða avgjørd í dag klokkan 13, tí tá fara formenninir úr Sambandsflokkinum, Fólkaflokkinum og Miðflokkinum, teir eru ávikavist Bárður á Steig Nielsen, Jørgen Niclasen og Jenis av Rana, at viðgera spurningin um, hvussu samstarvið millum flokkarnar kann halda fram.

Sjálvstýri stendur klárt

Ein møguleiki er, at Sjálvstýri gerst ein partur av samgonguni, so at hon aftur fær ein parlamentariskan meiriluta upp á 17 tingfólk. 

Tað hevur flokkurin longu boðað frá, at hann ynskir, men afturfyri krevur flokkurin, at hann fær eitt landsstýrisfólk. 

Við útvarpstíðindini á middegi í gjár upplýsti Sámal Petur í Grund, formaður í Sjálvstýri, at hann tá ikki hevði verið í sambandi við løgmann um tilboðið.