Koppseta nú børn fyri koronu

Í morgin verður farið at koppseta tey fyrstu børnini millum 5 og 11 ár í Føroyum.

Í fyrsta umfari verður bara koppsett í Havn. Tað er Tjaldurs Apotek, sum fer at taka sær av uppgávuni.

Tað eru heilsufrøðingar, ið taka sær av sjálvari koppsetingini, og sjúkrahúsverkið hevur ábyrgdina av teimum. Lækni frá sjúkrahúsverkinum verður eisini knýttur at tí einstaka koppsetingarstaðnum.

Korona.fo skrivar, at í næstum væntast, at Suðuroyar Sjúkrahús og Norðoya Apotek í Klaksvík eisini verða umfatað av skipanini. 

Kunnu bíleggja tíð

Longu nú ber til at bíleggja tíð til koppseting á heimasíðuni korona.fo.

Um tørvur verður á tí, er tað møguligt seinni at skipa fyri støkk-inn-koppsetingum aðrastaðni í landinum.

Samtykki krevst til koppseting av børnunum, og tí er umráðandi, at annað foreldrið ella møguligur verji hjá barninum er við til koppsetingina at vátta bíleggingina.

Fyri at sleppa undan ov nógvum trongsli á koppsetingarstaðnum, verður tó mælt til, at bara eitt vaksið fólk kemur við hvørjum barni, skrivar Sjúkrahúsverkið.