Fyrsti fundur í samstarvsráðnum verður í summar

Arbeiðið í nýggja samstarvsráðnum og spurningurin um nýtt fongsul í Føroyum vóru á skránni, tá Bárður á Steig Nielsen, løgmaður, hevði fund við Mette Frederiksen, forsætisráðharra, í Keypmannahavn í dag. 

Á fundinum umrøddu tey ymisk týðandi mál millum Føroyar og Danmark. Eitt nú, hvussu arbeiðið í nýggja  uttanríkis,- trygdar,- og verjupolitiska samstarvsráðnum, skal skipast í framtíðini, skrivar Løgmansskrivstovan.

Fundur í summar

Føroyar hava í løtuni formansskapin í ráðnum, og fyrsti fundur verður í Føroyum í juni. Løgmaður og danski forsætisráðharrin umrøddu eisini spentu støðuna í Ukraina.

Løgmaður nýtti eisini høvi at gera vart, at tað er óheppið, at danskir myndugleikar ikki hava málið um betri fongsulsviðurskifti í Føroyum við, nú nýggj langtíðaravtala er gjørd um karmarnar hjá Kriminalforsorgini.