Kringvarp Føroya vísir TROM

Føroyar eru karmur um krimirøðina TROM, sum er fyrsta sjónvarpsrøð, ið er upptikin í Føroyum. 

Krimirøðin byggir á bøkurnar hjá Jógvani Isaksen, og tað er Torfinnur Jákupsson, ið hevur skrivað TROM. 

Tí er tað ikki meir enn rætt og rímiligt, at føroyingar eisini sleppa at síggja TROM í sjónvarpinum. 

TROM í sjónvarpinum

Kringvarp Føroya fer nevniliga at vísa TROM í sjónvarpinum, og tað fer eisini at bera til hjá øllum, sum eru stødd í Føroyum, at hyggja eftir TROM her á heimasíðuni. 

"Kringvarpið er fyri allar føroyingar, og tí hevur tað stóran týdning, at vit sum public service-miðil eisini kunnu vísa øllum føroyingum hesa spennandi føroysku krimirøðina," staðfestir Ivan Niclasen, stjóri. 

TROM verður tøk á Viaplay 13. februar, og fyrsti partur av røðini verður vístur í sjónvarpinum hjá Kringvarpinum hóskvøldið 17. februar og komandi fimm hóskvøldini.

TROM, Olaf Johannessen, filmsvinna

KVF hevur stuðlað TROM

Kringvarp Føroyar hevur eisini havt ein virknan leiklut í framleiðsluni av TROM, tí Kringvarpið hevur stuðlað røðini fíggjarliga og hevur eisini latið útgerð, starvsfólk og høli til framleiðsluna. 

TROM, filmsvinna, filmar

“Hetta síggja vit sum ein týdningarmiklan part av at stuðla føroyska filmsumhvørvinum," staðfestir Barbara Samuelsen, programmleiðari í Kringvarpinum. 

"Samstundis er tað eisini umráðandi, at Kringvarpið, sum tann føroyski public service-miðilin, sleppur at vísa føroyingum røðina”, leggur hon afturat. 

TROM, filmsvinna, filmar,

TROM plottið

TROM snýr seg um journalistin Hannis Martinsson (Ulrich Thomsen), sum kemur aftur til Føroya, haðani hann er ættaður, tí ein kvinna, Sonja á Heyggi (Helena Heðinsdóttir), sum sigur seg vera dóttir hansara, heldur seg vera í lívsvanda. 

Skjótt fær Hannis Martinsson frænir av, at álvarsom brotsverk verða framd, tí Sonja á Heyggi, sum er atgerðarfólk (aktivist) og djóraverndarfólk, er horvin undir sera illgrunasomum umstøðum. 

Hannis verður skjótt vavdur upp í kanningararbeiðið, og slóðin leiðir hann til ein víðgongdan djóraverndarfelagsskap og ikki minst til stóra vinnulívsmannin, Ragnar í Rong (Olaf Johannessen).

Kanningararbeiðið hjá Hannisi ger, at hann kemur í tvídrátt við løgregluna, og tað førir til samanbrestir við kanningarleiðaran Karlu Mohr (Maria Rich), tí avdúkingarnar hjá Hannisi standa ofta í andsøgn við tað, ið løgreglan heldur um málið. 

TROM, filmsvinna, filmar,