Schjønberg í 07 Vestur: farin undir risauppgávu

Hann hevur vunnið týsku Bundesliguna og spælt 44 dystir fyri Danmark. Nú er Michael Schjønberg venjari hjá 07 Vestur, og skal verða við til at lyfta felagið upp á hægri stig

Símun Christian Olsen

07.03.2022 - 20:39

Í 1998 vann Michael Schjønberg týska meistaraheitið við Kaiserslautern, og danin hevur eisini spælt 44 landsdystir í reyðum og hvítum.

Nú er hann - umvegis fleiri feløg og starvsheiti - vorðin venjari hjá 07 Vestur í Betri-deildini.

- Mær dámar væl avbjóðingar, og ætlaninar hjá felagnum ljóðaðu spennandi, sigur navnframi danski venjarin, sum fegin vil vera í Vágum í minst tvey ár.

Skulu byggja upp

Málið hjá besta liðnum í ár er at varðveita plássið í bestu deildini.

- Síðan vilja vit byggja upp á tað. Vit vilja fegin menna føroyskar spælarar, og ætlanin er, at liðið í høvuðsheitum er mannað við egnum tilfeingi. Tað er ein risauppgáva, men hon er ikki ógjørlig, greiðir Michael Schjønberg.