Hava keypt nýtt Sandshav

Sandingar fáa eitt annað línuskip fyri Sandshavið, skrivar Fiskur.fo.

Talan verður um frystilínuskipið Kristrún úr Reykjavík, sum skal avloysa Sandshavið. Hóast Kristrún og Sandshavið eru javngomul, er Kristrún eitt stig rætta vegin, tá ið talan er um menning, siga eigararnir.

Nýggja skipið er 47,7 metrar langt og 9 metrar breitt, meðan Sandshavið er 34 metrar langt og 7,5 metrar breitt.

Frysta 20 tons um samdøgrið

Skipið, sum helst fær navnið Sandshavið klárar at frysta 20 tons um samdøgrið, og tað gevur munandi betri umstøður at reka fiskiskap, enn tað ger í løtuni. Eitt nú kunnu túrarnir í Grønlandi og Íslandi vera longur, og nýggja skipið kann eisini fara á Flemmish Kap.

Nýggja Sandshavið er sama slag sum Kambur, Eivind og Jákup B, men eins og við Jákupi B, er nýggja Sandshavið longt, síðani tað var bygt.

Kristrún er í løtuni til fiskiskap, og verður yvirtikið um ein góðan mánaða, skrivar Fiskur,fo.