Landsrætturin viðger Eik-málið í 25 dagar

25 dagar eru settir av í Eystara landsrætti til sakarmálið millum Fíggjarligt støðufesti og teir tríggjar Eikmenninar, Marner Jacobsen, sum var forstjóri, Frithleif Olsen, ið var nevndarformaður, og Odd Bjellvåg, sum var næstformaður í Eik.

Málið byrjaði í gjár. Nakrir dagar eru settir av nú í apríl, nakrir í mai, nakrir í juni, og seinastu dagarnir vera hálvan august.

Teir tríggir menninir vóru í Føroya rætti 18.november 2019 dømdir at rinda tilsamans 150 milliónir krónur í endurgjaldi til Fíggjarligt støðufesti í sambandi við, at Eik banki kollsigldi. 

Teir kærdu dómin til Landsrættin.

Krevja frídøming

Í Landsrættinum krevja teir frídøming, ella, í øðrum lagi, at skula gjalda minni enn 150 milliónir. Fíggjarligt støðufesti krevur, at dómurin hjá Føroya rætti verður staðfestur.

Málið er stórt. Í Føroya rætti vardi tað í 45 dagar. Nøkur vitni eru, og 70.000 skjøl eru í málinum. 

Ingi Højgaard er sakførari hjá Frithleifi Olsen, Christian Andreasen hjá Odd Bjellvåg og Søren Lundsgaard hjá Marneri Jacobsen.

Claus Juel Hansen er sakførari hjá Fíggjarligum støðufesti.

Odd Bjellvåg, Frithleif Olsen og Marner Jacobsen