Frítekst tagging:
- Tíðindi, mentan og ítróttur
'Gøtuítróttur' í miðdeplinum
'Gøtuítróttur' í miðdeplinum
Da Sjúka er tiltak, sum setir sonevndan gøtuítrótt í miðdepilin. Áhugin fyri alternativum ítrótti er vaksandi, siga fyrireikararnir, og tað sást aftur á Bacalao um vikuskiftið
20.06.2022 - 18:29
Da Sjúka setir 'gøtuítrótt' í miðdepilin.
- Vit merkja væl, at tað er ein áhugi millum børn og ung, sigur Ólavur Thorsteinsson, sum er ein av fyriskiparunum av tiltakinum, sum hevur nøkur ár á baki.
Í ár skuldi gøtuítrótturin vísast fram á Tórsgøtu - sum tað sømir seg - men vánaliga veðrið leygardagin gjørdi, at tiltakið varð flutt inn í Bacalao á Vestaru bryggju, har fleiri av alternativu ítróttagreinunum halda til.
- Ein dag sum í dag eru nógv børn við foreldrum, og tey eru alt frá trý til átta ára gomul, greiðir Ólavur Thorsteinsson frá.
- So eru tað tey, sum koma sjálvi, sum eru millum 10 og 14 ára gomul. So hava vit eisini nøkur vaksin, sum koma at royna seg.
Parkourvenjari komin úr Danmark
Parkour er ein lutfalsliga nýggj ítróttargrein í Føroyum.
Hon snýr seg ikki endiliga um at kappast - heldur handlar tað um at nýta kroppin og flyta seg á einum øki á alskyns hátt framvið alskyns forðingum.
- Eg trúgvi, at tað eru fleiri, sum ikki dáma fótbólt, svimjing ella hondbólt - tað traditionella - sum ikki endiliga vilja íðka fyri at vinna, sigur Óðinn Katrinarson Johansen.
- Her eru óivað fleiri, sum høvdu dámt tað, enn sum íðka í løtuni.
Danin, Marcus Grandjean, var komin úr Danmark at leggja fólki lag á.
- Eg vóni, at fleiri ung síggja, hvat parkour er, og hvat er so gott við parkour, sigur hann.
- Og at fólk her í Føroyum fáa íblástur til at brúka hendan rørsluítróttin.
Ólavur Thorsteinsson ætlar at hava tiltakið einaferð afturat í summar, og tá er meiningin, at tað skal vera uttandura.
Gøtuítróttur kann onkursvegna setast í samband við alternativa gøtumentan
Er kopiera
Nýggjastu sendingar í ÚV
Nýggjastu sendingar í SV
