Grindamannafelagið: Best er um onki hámark er sett á

- Um hetta kann gera, at vit kunnu halda fram við at drepa springarar, so kunnu vit nokk liva við tí, sigur næstformaðurin í felagnum, Tóri Simonsen. Best var tó, um einki hámark var, leggur hann afturat.

Ætlanin hjá landsstýrinum er eisini at betra fyritreytirnar fyri, at springaradráp kunnu ganga skjótt og munadygt.

Ein einstakur serframleiddur mønustingari til springara er gjørdur, og ætlanin er at royna hann.

Eisini er ætlanin at kanna, um ein serstakur springaraknívur eigur at verða gjørdur, ið somuleiðis kann betra um drápsháttin.

- Hetta eru átøk, Grindamannafelagið tekur undir við, tí vit eiga at fara fram í sambandi við springaradráp, sum vit í mong ár hava gjørt í sambandi við grindadráp, sigur Tóri Simonsen.

- Mønustingarin til springara er royndur við smáhvali og hevur víst seg at rigga væl, men trupulleikin er, at vit enn bara hava ein mønustingara, og tað er ov lítið, sigur hann.

- Best var, um vit høvdu nakrar kring landið, so vit fingu roynt teir, tá ið ein møguleiki er til tað, sigur næstformaðurin í Grindamannafelagnum.

Hvalaveiða í Føroyum er eitt gott íkast til húsarhald í Føroyum, og hetta er matur, sum hevur eina lutfalsliga lága kolevnisslóð.

Landsstýrið vísir eisini á, at møguleikin at veiða hval hevur týdning í mun til matvørutrygdina hjá føroyska samfelagnum.