Føroyingar skulu sleppa í hagan ókeypis

Tingsetan er ikki meira enn byrjað, og longu nú er fyrsta uppskotið um gongd í haga komið hagar.

Javnaðarflokkurin hevur uppskot til samtyktar um rættin hjá føroyingum at ganga í haganum ókeypis.

Flokkurin heldur tað ikki vera órímiligt, at gjald verður tikið frá útlendskum ferðafólkum og vinnuligum virksemi og avmarkingar settar, sum skulu verja okkara náttúru. 

Aftur í løglistanum

Landsstýrið hevur leingi arbeitt við hesum málinum, men einki lógaruppskot er komið enn.

Gongd í haga stendur tó í løglistanum aftur í ár. 

Løgmaður segði á ólavsøku, at skiljast skal millum privata og vinnuliga gongd í haga. 

Føroyingar skulu, eins og siðvenjan hevur verið, hava møguleika at njóta føroysku náttúruna, segði hann.