Gudstænasta aftur í gjónni

Hetta er fyrsta gudstænastan í gjónni í trý ár, eftir at koronufarsóttin gjørdi um seg.

Í ár verður tað Jógvan Fríðriksson, biskupur, ið prædikar, og eisini fer tónleikur at seta sín dám á løtuna.

Ari Hammer Joensen verður organistur, og fer millum annað at spæla Bach og variatiónir yvir sálmin “Nú takkið Guði øll”.

Eisini verður Eiðis Ljómfelag at hoyra, og eitt felagskór úr Vestmanna Sangkóri og Vágakórinum syngur.

Eisini úti á Argjum
Ein onnur útigudstænasta verður eisini í morgin, tí fyrrpartin í morgin, klokkan 11, verður útigudstænasta á AB-vøllinum á Argjum.

Hetta er aðru ferð, at Argja kirkja heldur gudstænastu á vøllinum á Argjum, og seinast var jólaaftan í fjør. 

Undir gudstænastuni syngur kvinnubólkurin Tabitha, og aftaná verður kirkjukaffi og okkurt søtt og sunkist til børnini.