Grava út fyri bygningi til tyrlusimulatorin

Í síðstu viku var farið undir at grava út fyri nýggja bygninginum til tyrlusimulatorin hjá Atlantic Airways.

Tað skrivar vp.fo.

Bygningurin verður á økinum oman fyri Hotel Vágar.

Tað er Sørvágs kommuna, sum skal gera økið byggibúgvið, og J&K Petersen hevur fingið arbeiðið.

Tyrlusimulator, Atlantic Airways

Tá Atlantsflog skrivaði undir sáttmálan við Thales Group um nýggja simulatorin. (Mynd: Bjarni Árting Rubeksen)

Íløgan er 100 mió. kr. 

Á tíðindafundi 2. juni boðaði Atlantic Airways frá, at flogfelagið hevði sett á stovn ein flogskúla við simulatori í Vágum. Íløgan er 100 mió. kr., og ætlanin er, at útlendskir tyrluskiparar eisini skulu koma til Føroya at brúka simulatorin.

Tá skrivaðu Niels Mortensen og Jóhanna á Bergi vegna Atlantic Airways undir keypsavtalu við Thales Group um at keypa ein nýmótans tyrlusimulator.

Tyrlusimulatorurin verður væntandi klárur at taka í nýtslu í fyrsta ársfjórðingi í 2024.