Óli P. farin um sýn

Hvørt mansbarn í Føroyum man ivaleyst kenna beinraktu strikuna hjá Óla P., sum í ein mansaldur hevur viðmerkt føroysk viðurskifti og føroyingar í síni heild við sínum skemtiligu keiputekningum.  

Í nátt andaðist Óli Petersen, 86 ára gamal. 

Óli Petersen teknaði so at siga til tað síðsta, tí tað var ikki fyrr enn um ársskiftið, at hann setti síðstu strikuna. 

21. januar í ár vóru John Johannessen, journalistur, og Jógvan Eli Dam, myndamaður, og vitjaðu Óla P. í sambandi við, at Óli gavst sum keiputeknari. 

Rukkulakkin

Óli P., sum var klaksvíkingur, gjørdi av álv­ara vart við seg sum keiputeknari í Rukku­lakk­a­num, sum var bók­ling­ur við skemti­tekn­ing­um og teksti, ið klaks­­vík­ing­ar í nøkur ár gjørdu í sambandi við norð­oy­a­stevn­una.

Seinni teknaði hann eitt skifti í Dimma­lætting. 

Óli P., sum var útbúgvin tekniskur assistentur, arbeiddi fyrst á teknistovuni á Skála Skipasmiðju, har hann eisini búsetti seg, áðrenn hann fór at starvast sum keiputeknari burturav á Sosialinum í 1988.

Stutt áðrenn Óli. P. skifti Skála skipasmiðju út við Sosialin, var mentanarsendingin í Sjónvarpi Føroya, Gluggin, og vitjaði Óla á Skála. 

Hetta var í sambandi við, at Óli hevði myndprýtt útgávuna av kvæðnum Jákup á Møn, sum kom út sum teknisøga. 

Óli P. teknaði í 25 ár fast fyri Sosialin, men eft­ir at samstarvið við Sosialin helt uppat í 2013, teknaði Óli eitt stutt skifti fyri Portal.fo. Seinastu seinastu fimm árini hev­ur Óli P. teknað fyri Vágaportalin (VP.fo), áðrenn hann gavst at tekna keiputekningar á nýggjárinum.

Óli Petersen var vangamynd í Degi og viku 13. desember 2013. 

Í 2018 hevði Óli P. verið teknari í 60 ár. Sjónin var farin at bila, tá mentarnarsendingin LYST var og vitjaði hann heima á Skála 16. februar 2018