Ungdómsbókasavn á Býarbókasavninum

Hósdagin letur upp ungdómsbókasavn á Býarbókasavninum í Havn.

Ungdómsbókasavnið er eitt innbjóðandi stað, sum gevur teimum ungu íblástur, møguleika og umstøður at vera á bókasavninum, skrivar Tórshavnar kommuna. 

Umframt at hava gott úrval av ungdómsbókum á bæði føroyskum, donskum og enskum, hevur ungdómsbókasavnið eisini teknirøðir, pláss at spæla borðspøl, lesikrókar og góðar lestrarumstøður. 

Á vetrarskránni fyri ung er millum annað lesiringar fyri ung, verkstovur og kvøld við borðspæli.

Ungdómsbókasavnið letur dyrnar upp hósmorgunin kl. 10.