Borgarstjórin tekur alla ábyrgdina

Runavíkar kommuna tekur til eftirtektar niðurstøðuna hjá Løgtingsins umboðsmanni um eina kæru um loyvi til at byggja neyst í kommununi.

Tað sigur Tórbjørn Jacobsen, borgarstjóri.

Hann sigur, at í álitinum hjá Løgtingsins umboðsmanni verður skotið ógviliga breitt um ábyrgdarplasering. 

Tekur alla ábyrgd

- Deildir og formenn í nevndum standa fyri skotum, men lat meg gera púra greitt, fyri Guði og monnum, at eg einsamallur sum valdur borgarstjóri og harvið ovasti leiðari fyri umsitingini, taki fulla og treytaleysa ábyrgd á meg hesum málinum viðvíkjandi, sigur Tórbjørn Jacobsen.

Løgtingsins umboðsmaður gav Runavíkar kommunu álvarsliga átalu fyri handfaringina av umsóknunum um byggiloyvi til neyst, og mælti Runavíkar kommunu til at endurskoða mannagongdir sínar í sambandi við byggimálsviðgerð.

Av tí at umboðsmaðurin helt, at álvarslig mistøk vóru gjørd, vóru formansskapurin í løgtinginum, løgmaður og landsstýrismaðurin í kommunumálum kunnaðir um málið.