Hagstovan fær játtan til fleiri hagtøl um ferðavinnu

Hagstovan fær næsta ár pengar til at gera fleiri hagtøl um ferðavinnuna.

800.000 kr. eru til hetta í uppskotinum um fíggjarlóg fyri 2023.

Kannast skal, hvørjir partar í ferðavinnuni løna seg best, hvussu nøgd ferðafólkini eru, sum koma til Føroya, hvar í landinum ferðafólkini brúka pening, og hvussu atferðin er hjá ferðafólkum úr ymiskum londum.

Nýggja játtanin til hagtøl verður til Hagstovuna at menna og reka skipanina TSA, Tourism Sattelite Account. 

Við hesi skipan vera føroysku hagtølini gjørd eftir føstum altjóða leisti, so gongdin í okkara ferðavinnu kann berast beinleiðis saman við gongdina í ferðavinnuni í øðrum londum.