Nýggja miðlastuðulsnevndin fær meira at býta út

Landsstýrismaðurin í mentamálum, Jenis av Rana, hevur sett nýggja miðlastuðulsnevnd.

Nevndin er longu farin til verka, og skal sita í trý ár, til 1. oktober 2025.

Bjørk Maria Kunoy, løgfrøðingur, er forkvinna í nevndini, og Dánjal Højgaard er næstformaður. Tey bæði eru sett eftir tilmæli frá Búskapar- og Løgfrøðingafelagnum.

Hini í nýggju miðlastuðulsnevndini eru John Johannessen, eftir tilmæli frá Føroyskum Miðlafólkum, og Hallbera West, eftir tilmæli frá Fróðskaparsetrinum.

Stuðul til privatar tíðindamiðlar

Varafólk í nevndini eru Sigrún Brend og Martin Nolsøe Simonsen.

Høvuðsuppgávan hjá miðlastuðulsnevndini er at býta stuðulin á fíggjarlógini út til til privatar tíðindamiðlar.

Á fíggjarlógini fyri í ár eru tvær milliónir krónur settar av til lønir og verkætlanir. 

Landsstýrismaðurin hevur í fíggjarlógaruppskotinum fyri 2023 hækkað játtanina hálva millión, upp í 2,5 milliónir krónur.