Søren Gade formaður í fólkatinginum

Søren Gade, fyrrverandi verjumálaráðharri, er valdur til fyribilsformann í fólkatinginum, og hann verður væntandi valdur til formann í morgin, tá fólkatingið formliga fer at góðkenna formansvalið.

Vinstriflokkurin skeyt um vikuskiftið upp at velja Søren Gade til nýggjan formann, og sosialdemokatarnir, SF, Moderatarnir og Nýggju Borgarligu tóku undir við uppskotinum.

Sostatt er stórur meiriluti í fólkatinginum fyri at velja Søren Gade til formann. 

Men hvørki Alternativið ella Eindarlistin taka undir við, at Søren Gade verður nýggjur fólkatingsformaður.

Báðir flokkar vísa á, at Søren Gade hevur verið uppi í málum, sum endaðu við, at hann noyddist at leggja frá sær sum verjumálaráðharri i 2010. 

Søren Gade segði í fólkatinginum í dag, at hann "ætlar at vera formaður fyri alt fólkatingið," sum hann málbar seg.