Håkan Ericson: Í dag høvdu vit ongan kjans

 - Í dag høvdu vit ongan kjans ímóti einum nógv betri liði.

So greiður var landsliðsvenjarin hjá Føroyum, Håkan Ericson, eftir 5-0 tapið fyri Kekkia í Olomouc mikudagin.

Føroyingarnir sóu Mojmír Chytil skjóta bæði eitt, tvey og trý mál upp á tíggju minuttir tíðliga í dystinum, og seinni øktu Václav Černý og Patrizio Stronati.

Venjarin helt, at okkurt av málunum hjá heimaliðnum vóru bílig, men viðgekk samstundis, at Kekkia tað sama kundi havt skorað upp á onkran annan møguleika.

Hann nevndi skjóta og ágangandi spælið hjá heimaliðnum, sum skjótt gjørdi, at Heðin Hansen var tikin av miðvøllinum og aftur í miðverjuna.

Eisini tosaði hann um í stóran mun miseydnaðu royndirnar at fáa í lag spæl við bóltinum fyri steðgin.

 - Tú roynir, og so missir tú bóltin, og tað er trupult at handfara, segði Håkan Ericson.

 - Spurningurin verður so ofta, um tú skalt tora yvirhøvur at spæla ímóti slíkum liðum, ella um tú bara skalt sparka langar bóltar. Samstundis vunnu teir flestu nærdystirnar, so eg fann onga veruliga loysn upp á trupulleikan, segði landsliðsvenjarin, sum hóast tapið var nøgdur við reaktiónina og innsatsin eftir steðgin.

Sí samrøðuna við Håkan Ericson omanfyri.