Landsrætturin skal viðgera trætu um loðsflutning í Fuglafirði

Gamla trætan millum Fuglafjarðar kommunu og Kappingarráðið verður viðgjørd í Eystara landsrætti í næstu viku.

Talan er um loðsflutning.

Málið byrjaði longu í 2014, tá Fuglafjarðar kommuna gjørdi av, at bara ein fyritøka kundi veita loðstænastu í Fuglafjarðar havn. 

Í 2018 staðfesti Kappingarráðið, at hetta var brot á kappingarlógina, tí kommunan hevði forðað einari aðrari fyritøku at veita loðsflutning.

Kommunan kærdi

Fuglafjarðar kommuna kærdi avgerðina til Vinnukærunevndina, sum í januar 2019 staðfesti avgerðina hjá Kappingarráðnum. 

Men kommunan gavst ikki so. Hon fór í Føroya rætt.

Heldur ikki har fekk hon viðhald. 6.mai í fjør staðfesti Føroya rættur avgerðina hjá Kappingarráðnum.

Fuglafjarðar kommuna fór so í Landsrættin, sum skal viðgera málið mikudagin.