Ógreið støða til fosturtøku

– Tað kann vera trupult hjá føroyskum veljarum at meta um, hvørja støðu ymisku politisku flokkarnir hava til fosturtøku, segði Hallbera West, stjórnmálafrøðingur, við danska kringvarpið í gjár. 

Hon vísti á, at tað bara er ein av teimum sjey flokkunum, ið hevur tikið eina týðiliga støðu til fosturtøkumál, meðan hinir flokkarnir hava fríttstillað síni valevni, tá ið tað kemur til etisk mál so sum fosturtøku.

Tað eru helst mong, ið halda, at fosturtøka er eitt týdningarmikið mál, men tað verður trupult at grunda sítt val á hetta, eftirsum flestu flokkar ikki hava tikið eina felags støðu til málið.

Tá talan er um fosturtøku, er tað ikki avgerandi, hvør flokkur verður valdur, men hvørji valevni verða vald, og fyri veljaran er hetta ein trupulleiki, vísti Hallbera West millum annað á.