Fiskimenn verri fyri mentalt, tá túrur endar

Føroyskir fiskimenn eru munandi verri fyri sálarliga, mentalt, tá ein túrur endar enn teir vóru, tá teir fóru avstað.

Fatanin hjá teimum um rúm og rætning og reaktiónstíðin eru nógv verri, og minnið er nógv vánaligari.

Tað vísir ein stór kanning, sum Annbjørg Abrahamsen, vinnusálarfrøðingur og ph.d.-lesandi á deildini fyri arbeiðs- og almannaheilsu, gjørdi.

Ein grein um kanningina er júst almannakunngjørd í vísindaliga tíðarritinum International Maritime Health. 

Rull og larmur

Fiskimenninir hava langar arbeiðsdagar í rulli og larmi og sova fyri tað mesta styttri og minni samanhangandi enn teir gera á landi.

Endamálið hjá Annbjørg Abrahamsen var at kanna, hvussu hetta ávirkar mentalu førleikarnar hjá manningini.

Kanningarnar vóru gjørdar frá mai 2017 til juli 2018.  157 fólk við 18 fiskiskipum vóru við í kanningunum.

Kanningarnar vístu týðiliga, at arbeiðstíðir og svøvnur hava stóra ávirkan á, hvussu troytt manningin verður og teirra mentalu avrik. 

Annbjørg Abrahamsen

Annbjørg Abrahamsen, vinnusálarfrøðingur, hevur gjørt kanningina. (Mynd av Facebook-vanga)

Neyðugt at betra trygdina

Niðurstøðan er, at neyðugt er at betra trygdina á skipunum.

Síðani Annbjørg Abrahamsen fór undir kanningarnar, er lógin um hvílitíð hjá sjófólki broytt soleiðis, at fiskimenn nú skulu hvíla í minsta lagi 10 tímar um dagin og 77 tímar um vikuna. 

Vaktirnar á garnabátum kunnu ikki longur vera 16 og átta tímar.

Og trolaramenn kunnu ikki petta svøvnin í trý-fýra skeið um dagin.