Súsanna og Áslakur í danska flogbóltsendaspælinum

Tveir føroyskir flogbóltsspælarar verða við í danska flogbóltsendaspælinum, sonevnda Final4, sum skal spælast fyrst í februar.

Súsanna Sólrunardóttir Ludvig og felag hennara, Brøndby VK vunnu greitt 3-0 í fjórðingsfinaluni ímóti VLI, meðan Áslakur Holm og VK Vestsjælland vunnu 3-1 á Amager VK2.

Mótstøðuliðini hjá Súsannu Sólrunardóttir Ludvig verða ASV Elite, Holte IF og DHV Odense. Brøndby skal spæla ímóti DHV Odense í hálvfinaluni, og má roknast sum favorittur, tí fyrr í ár vann Brøndby 3-0 ímóti júst Odense.

Áslakur Holm og VK Vestsjælland skulu kappast við Nordenskov UIF, Marienlyst-Fortuna Volley og Gentofte Volley í Final4. VK Vestsjælland brestir saman við Gentofte Volley, sum teir fyrr í kappingini taptu 3-2 fyri, í hálvfinaluni.

Endaspælið verður leikt í Aarhus 3. og 4. februar næsta ár.