Gott vetrarveður og fleiri bilar góvu betri tryggingarúrslit

Gott vetrarveður, færri skaðar, fleiri bilar og fleiri viðskiftafólk gjørdu, at fyrra hálvárið hjá Trygd var betri enn fyrra hálvárið í fjør.

Eftir skatt var úrslitið 10,8 mió. kr. í ár, 2,4 milliónir betri enn í fjør.

Sera væl nøgd

Leiðslan í Trygd, sum BankNordik eigur, sigur seg vera væl nøgda við úrslitið. Ein orsøk til góða úrslitið eru bilarnir.

Janus Thomsen, stjóri í Trygd sigur, at fleiri nýggir bilar verða seldir og tá eisini tryggjaðir.

- Tað síggja vit aftur í úrslitinum, sigur Janus Thomsen.

Vænta ikki so gott úrslit seinna hálvár

Trygd væntar ikki, at seinna hálvár verður eins gott og tað fyrra. Tað er vorðið bíligari at tryggja, og veðrið kann ikki væntast at verða eins gott í heyst sum farna vetur.

Tí væntar Trygd, at ársúrslitið fyri 2013 verður 10-12 mió. kr. Eginognin hjá Trygd var tann 30.juni í ár knappliga 100 mió. kr., 98,8 milliónir fyri at vera heilt neyv.