Noyðast at avmarka flogferðsluna á Svalbard

Flogferðslan til og frá Svalbard er vaksin so nógv seinastu árini, at myndugleikarnir nú kenna seg noyddar at seta avmarkingar á ferðsluna.

Tað eru serliga tey sonevndu charter-flogførini - leigutúrar - sum eru vorðin fleiri í tali á Svalbard, og sum geva floghavnini avbjóðingar. Í 2022 vóru tvífalt so nógv charterflogfør á flogvøllinum í Longyearbýnum sum í 2019.

Tað er serliga í sambandi við tey mongu cruise-skipini, sum koma til Svalbard, at charterflogferðslan eisini veksur, skrivar NRK.

Flogvøllurin í Longyearbýnum er lítil, og tí er nú avmarking sett á, so bert seks flogfør kunnu koma til ella fara úr Longyearbýnum um dagin. Tá ferðslan var upp á tað mesta í fjør, fóru átta flogfør um flogvøllin um dagin.

Ongar ætlanir eru um at útbyggja flogvøllin á Svalbard, skrivar NRK.