Evstamark at bjóða er um 14 dagar

Evstamark at bjóða upp á partabrøvini, sum landið eigur í p/f Tjaldri, er um 14 dagar - tað vil siga um morgunin 16. januar.

Landið eigur 2,8 prosent í Tjaldri.

Fíggjarmálaráðið hevur sett gongd á aftur sølutilgongdina, eftir at ráðið í november bað grannskoðaravirkið Januar steðga sølutilgongdini, tí løgtingsval varð útskrivað.

Eftir evstarmark fer granskoðaravirkið, sum skipar søluna, at samskifta við tann ella teir keyparar, sum hava latið boð inn.

Avgreidd fyrst í februar

Sølan verður eftir ætlan endaliga avgreidd í tíðarskeiðnum 1.-3. februar, skrivar grannskoðaravirkið Januar.

Landið kann fáa nógv meira fyri síni partabrøv í Tjaldri, enn tað hevur sett í fíggjarlógina, heldur Januar.

Í fíggjarlógini verður mett at fáa sjey milliónir krónur fyri partabrøvini, men Januar metir, at ognarparturin hjá landsstýrinum er verdur 18,2 til 23,1 mió.kr.