Samgongan viðger tunnilsmálið av nýggjum

Skal Eysturoyartunnilin gerast veruleiki, er neyðugt at viðgera tunnilsmálið av nýggjum.

Tað siga samgonguflokkarnir í tíðindaskrivi eftir samgongufundin í Tinganesi seinnapartin.

Nýggj tilgongd

Sum fyrsta stig fara formenninir í samgonguflokkunum saman við landsstýrismanninum í innlendismálum at viðgera støðuna og leggja til rættis eina tilgongd, ið kann bera á mál. Í viðgerðini verður eisini lagt upp fyri tí tilgongd, ið ein politiskur bólkur við samgongu- og andstøðulimum, er í gongd við viðvíkjandi Suðurleiðini.

Við í viðgerðini vera embætisfólk umboðandi Landsverk, Innlendismálaráðið, Vinnumálaráðið, Fíggjarmálaráðið og Løgmansskrivstovuna. Uppskot til loysn verður eftir ætlan klárt um tvær vikur, verður sagt í tíðindaskrivinum.