Kári P. Højgaard sleppur at halda fram í landsstýrinum

Løgmaður ætlar ikki at koyra Kára P. Højgaard frá sum landsstýrismann í innlendismálum. Tað er greitt, nú løgmaður í morgun hevur svarað einum fyrispurningi frá Høgna Hoydal, løgtingsmanni.

Høgni Hoydal spurdi millum annað: Ætlar løgmaður at loysa landsstýrismannin úr starvi og reisa eitt revsimál sambært lóg um ábyrgd landsstýrismanna?

Svarið hjá Kaj Leo Holm Johannesen, løgmanni, er stutt og greitt "Nei". Og tað vil so siga, at Kári P Højgaard sleppur at halda fram í starvinum sum landsstýrismaður.

Hevur biðið um frágreiðing

Løgmaður bað í farnu viku landsstýrismannin um eina frágreiðing. Hetta hendi eftir at Kringvarpið legði fram nøkur skjøl, har embætisfólk í Innlendismálaráðnum settu stór spurnartekn við lógaruppskotið um Eysturoyartunnilin -  skjøl, sum ikki komu í tingið saman við lógaruppskotinum, og sum almenningurin heldur ikki fekk innlit í. Frágreiðingin skuldi vera liðug í dag.

Løgmaður hevur sagt, at hann fór at taka støðu til landsstýrissessin hjá Kára P Højgaard, tá hann hevði fingið frágreiðingina. Men nú hevur løgmaður eftir øllum at døma tikið støðu: Kári P Højgaard verður verandi í landsstýrissessinum, sæst av svarinum til Høgna Hoydal í morgun.