Fíggingin er altavgerandi

Tað er sambandstingmaðurin, Erhard Joensen, ið vil hava Dennis Holm, landsstýrismann, at svara sær tveimum spurningum um tunnilsfíggingina í einum grein 52a-fyrispurningi.

Erhard Joensen vísir á, at landsstýrismaðurin í samrøðu við Kringvarpið tann 22. desember hevur sagt, at Suðuroyartunnilin verður settur í gongd í hesum valskeiðnum, og tí vil hann hava meira at vita um fíggingina.

Tí spyr Erhard Joensen, hvørjir fíggingarleitir til Suðuroyartunnilin fyriliggja ítøkiliga, og um statslán frá Danmark er ein møguleiki.

- Fígging er altavgerandi fyri at gjøgnumføra hesa byggiverkætlan, og tí verður hesin fyrispurningur settur, sigur sambandstingmaðurin í viðmerkingum sínum til fyrispurningin.