Ferð komin á svimjihøllina í Runavík

Svimjihøll verður bygd í norðrara enda av Bylgjuni í Runavík, og leggur tvær lonir aftrat verandi bygningi.

Runavíkar kommuna skrivar á heimasíðuni í dag, at stutt eftir, at avtalan millum Runavíkar kommunu og Kanjon um bygging av svimjihøll varð undirskrivað 27.10.22, fór Kanjon í gongd við arbeiðið, sum er mett at taka góð tvey ár.

Svimjihøllin í Runavík, Bylgjan, Svimjihøll

Longu eina viku eftir undirskriving var nógv virksemi í økinum, og tey sum ferðast har javnan, leggja merki til, at har broytist skjótt.

Gamal millum bygningur tikin niður

Eftir innleiðandi fyrireikingar var fyrsta stigið at taka gamla millumbygningin niður.

Kanningar tíðliga í tilgongdini vístu, at tann bygningurin, sum ikki bleiv renoveraður, tá Bylgjan varð útbygd við fimleikahøll í 2014, ikki hóskaði sum partur av nýggju svimjihøllini.

Næsta stigið var at grava omanav, og er tað komið væl áleiðis. Í seinastuni er eisini sprongt í økinum.

Svimjihøllin í Runavík, Bylgjan, Svimjihøll

Djúpri endin av hylinum fer niður á fýra metra dýpi, tí skal gravast nakað niður aftrat, áðrenn farast kann undir bygging av svimjihøllini.

25 m. hyl við átta geilum

Svimjihøllin, sum nú verður bygd afturat Bylgjuni í Runavík, fer at hava alskyns hentleikar. 

Svimjihøllin í Runavík, Bylgjan, Svimjihøll

• 25 metra hyl við átta geilum, sum fer frá 1,35 metrar dýpi í grunna endanum til fýra metra dýpi í djúpa endanum. Tær átta geilarnar hava við sær, at hann er 21 metrar breiður.

Svimjihøllin í Runavík, Bylgjan, Svimjihøll

• Hangandi pall til lop omanfyri djúpa endan, sum klatrast skal upp til í reipstiga.
• Ein grynri barnahyl við tveimum ymiskum dýpdum, har børn kunnu spæla og annars venja seg við vatn.
• Eina vatnøku.

Svimjihøllin í Runavík, Bylgjan, Svimjihøll

• Eitt vælveruøki við heitum hyli, tveimum saunum og dampbaði, umframt køldum potti úti.

Svimjihøllin í Runavík, Bylgjan, Svimjihøll

• Tvey størri umklæðingarrúm og tvey smærri til familjur ella rørslutarnaði.
• Tvey størri umklæðingarrúm uppi á til virksemi í ítróttarhøllini.

Svimjihøllin í Runavík, Bylgjan, Svimjihøll

• Harumframt móttøku, fundarhøli, goymslur og onnur smærri høli.

Higartil hevur arbeiðið við svimjihøllini gingið skjótt og væl, og verður hon væntandi liðug á vári 2025, skrivar Runavíkar kommuna á heimasíðuni.