KVF og Tónleikasambandið menna “Spæl føroyskt”-átakið 

Spæl føroyskt-vikan verður aftur á skránni tann 6.-12. mars, men hesa ferð er leisturin broyttur. Tað verður bæði ein vika, har KVF fer at spæla føroyskan tónleik burturav og ein vika við framførslum og framløgum við føroyskum tónleiki kring alt landið og enntá á føroyskum sendistovum úti í heimi. Tað eru Tónleikasamband Føroya og KVF, sum samstarva um “Spæl føroyskt”.
 
Formaðurin í Tónleikasambandinum, Dánjal á Neystabø, fegnast um nýggja leistin: 

”Við Spæl føroyskt-vikuni seta vit føroyskan tónleik á breddan og eggja spælistøðum, stovnum, fyritøkum og privatpersónum at mynda vikuna, júst sum teimum lystir”, sigur hann. ”Tað kann vera ein framførsla í eini frisørsalong, ein barnagarður, sum framførir á einum ellisheimi, ella felagssangur í eini hugnaligari stovu. Tað er bert hugflogið, sum setur mørk”, leggur hann afturat.   

Spæl føroyskt-vikan skal styrkja savningarmegina innan føroyskan tónleik   

”Við Spæl føroyskt-vikuni vilja vit virka fyri einum livandi tónleikalívi, sum styrkir bond og skapar savningarmegi innan føroyskan tónleik. Her meina vit við allan tónleik, sum er framførdur ella framleiddur av føroyingum, alt frá Kingo-sálmi til tungmetal, rapp og føroyskan dans. Hetta er veruliga ein vika, ið heiðrar føroyskan tónleik í breiðastu merking, og stimbrar føroyska tónleikaarvin og málið,” sigur Dánjal á Neystabø.   

fma_logo_2023.png

Betri møguleikar fyri samstarvi

Í KVF fegnast tónleikasamskiparin, Eyðfinn Jensen, um, at “Spæl føroyskt”-vikan fær eina dimensjón afturat: 

“Líka síðan vit byrjaðu Spæl føroyskt í 2008, hevur átakið ment seg støðugt. Í fyrstani var talan um ein árligan Spæl føroyskt-dag í útvarpinum, sum seinni bleiv til tveir dagar um árið, og tá KVF tók stig til FMA í 2014, bleiv Spæl føroyskt víðkað til eina heila viku. Tað hevur altíð verið okkara ynski, at livandi tónleikur skuldi vera ein partur av Spæl føroyskt-átakinum, og í samstarvi við Tónleikasamband Føroya verður hetta nú veruleiki”, sigur Eyðfinn Jensen, sum eisini heldur tað vera eitt framstig, at Tónleikasambandið er vorðið ein partur av FMA-samstarvinum: 

“Tónleikasamband Føroya er ein yvirskipaður felagsskapur, sum umboðar øll onnur tónleikafeløg í Føroyum, og tað gevur okkum nýggjar og betri møguleikar at samstarva um ymisk mál á tónleikaøkinum. Spæl føroyskt og FMA eru bara tvey tey fyrstu dømini um hetta”, sigur Eyðfinn Jensen. 
 
Hæddarpunktið í Spæl føroyskt-vikuni er FMA (Faroese Music Awards), har føroyskur tónleikur verður fagnaður og heiðraður. Tiltakið er í Norðurlandahúsinum leygarkvøldið tann 11. mars og verður sent beinleiðis í sjónvarpinum hjá KVF.  Hetta er 10. árið á rað, at skipað verður fyri FMA.