10 milliónir til Stórhøllina næsta ár

10 milliónir krónur eru settar av í uppskotinum til fíggjarlóg til Stórhøllina í Hoyvík í 2024, og 10 milliónir krónur aftrat í 2025.

Fyrireikingarnar til høllina eru byrjaðar, og Almanna- og mentamálaráðið fer at seta neyðugar treytir, ið skulu verða uppfyltar, áðrenn stuðul verður veittur. 

Millum treytirnar er, at høllin skal lúka øll altjóða krøv sum hondbólts- og flogbóltshøll.

Í ávikavist 2024 og 2025 verða settar 10 milliónir krónur av til endamálið, so tað samsvarar við politisku ætlanina um at veita stuðul til verkætlanina. 

Í ár verður skotið upp, eins og í fjør, at seta 5 milliónir krónur av til Stórhøllina.

Ein heimildarlóg skal gerast, sum fevnir um allan stuðulin frá landinum, sum er tilsamans 30 milliónir krónur.

Sjálvsognarstovnurin Føroya Arena væntar, at høllin verður liðug í 2025.