Kommunan keypir bygningin hjá Faroe Ship

Tórshavnar kommuna keypir skrivstovubygningin hjá Faroe Ship á Eystaru bryggju fyri 12 mió. kr.

Faroe Ship bjóðaði Tórshavnar havn at keypa bygningin fyri 14 mió.kr. 

Í sambandi við, at nýggja havnarlagið verður tikið í nýtslu, fer Faroe Ship at flyta høvuðssætið í gráa pakkhúsið fyri at miðsavna virksemið á einum staði.

Høvuðsumvældur í 2012

Skrivstovubygningurin er frá 1935, men hann var høvuðsumvældur í 2012.

Sambært Faroe Ship var bygningurin í 2019 mettur at vera 16,5 mió.kr. verdur.

Fyri at hava betri møguleika at skipa havnarøkið og kunna stýra virkseminum har, heldur Tórshavnar havn, at tað er ein fyrimunur, at Tórshavnar havn keypir skrivstovubygningin.

Tórshavnar havn, Havnin í Havn, Eystara bryggja í Havn - Mynd: Faroe Ship

Faroe Ship flytur høvuðssætið í gráa pakkhúsið fyri at miðsavna virksemið á einum staði. (Mynd: Faroe Ship)

Semja um 12 milliónir

Hann kann síðani leigast til hóskandi leigara heldur enn, at ein tilvildarligur keypari er, sum sagt verður í skránni fyri býráðsfundin í gjár.

Semja er um, at keypsprísurin er 12 mió kr. 

Yvirtøkudagurin er tveir mánaðir eftir, at Faroe Ship er flutt út í høvuðssætið í gráa pakkhúsi.