Casanova gav Kasakstan bíligt brotsspark

Føroysku spælararnir vóru alt annað enn nøgdir, tá dómarin úr San Marino, Johnny Casanova, bríkslaði fyri brotssparkið til Kasakstan tíðliga í seinna hálvleiki. Á sjónvarpsmyndunum tóktist ónøgdin eisini væl grundað, tí tað sá út sum, at leikarin hjá Kasakstan datt uttan at nakar føroyingur kom undir hann.

Kasakstan javnaði til 1-1 við brotssparkinum. Tað gingu ikki nógvir minuttir, so var 2-1 til Kasakstan, sum eisini bleiv endaliga úrslitið.

Føroyar vóru annars á odda 1-0 í hálvleikinum við máli frá Fróða Benjaminsen.

Sum heild var talan um ein javnan dyst, har kasakstanar tó høvdu flest málmøguleikar.

Jónas Tór Næs fekk gula kortið, og tí hevur hann leikbann til dystin móti Týsklandi, sum verður týsdagin.