Sleppa ikki í skúlan, sum er fyrstaval

Aftur í ár eru fleiri børn í Tórshavnar Kommunu sum ikki sleppa í skúlan, sum tey hava sum fyrstaval.

Og aftur í ár eru tað Skúlin á Fløtum, Sankta Frans skúli og Hoyvíkar skúli, sum hava størstan áhuga.

- Talan er um 12 børn, sum ikki sleppa í fyrsta flokk í Skúlanum á Fløtum, sigur Regin Marnerson, skúlastjóri. 

Tó er gott pláss í forskúlanum á Fløtum. 

Einastu børnini, sum eru sloppin inn á Skúlan á Fløtum, eru tey, sum hava gingið í forskúla, ella hava systkin í skúlanum.

Eysturskúlin, Eysturskúlin í Havn - Mynd: Tórshavnar kommuna

Eysturskúlin. (Mynd: Tórshavnar kommuna)

Verða víst til aðrar skúlar

Við øðrum orðum eru børnini, sum lúka treytirnar, at tey skulu búgva í nærumhvørvinum, ikki sloppin inn. 

Kommunan vísir hesum børnum til Eysturskúlan ella Skúlan á Argjahamri. Og tey, sum ikki sleppa inn í Hoyvíkar skúla, vera víst til Skúlan á Løgmannabreyt. 

50 børn vilja ganga í Hoyvíkar skúla, men skúlin hevur pláss fyri 48 næmingum. Sostatt eru tveir næmingar vístir til Skúlan á Løgmannabreyt. 

Í hádeildini er nýggj regla, at tað bara eru næmingar í Havn, sum kunnu søkja inn á ítróttabreyt í Skúlanum á Fløtum. 

Tað merkir, at kemur eitt barn úr Kvívík til Havnar at ganga í framhaldsdeild, kann tað ikki søkja um at sleppa at ganga á ítróttabreytini.