Samtak: Arbeiðsgevarar kunnu seta fólk í fast starv

Samstundis sum Vinnuhúsið vil taka serskipanir av, vilja arbeiðsgevararnir ikki seta fólk í starv við føstum lønum, so fiskavirkisskipanin verður óneyðug.

Tað sigur Samtak, nú Vinnuhúsið hevur mælt til, at allar serskipanir verða tiknar av, m.a. fiskavirkisskipanin.

Heldur enn at skera í inntøkuni hjá vanligum fólkum, áttu umboðini fyri arbeiðsgevararnar at sett fólk í fast starv við fastari inntøku, sum fastlønarsáttmálin er til. 

Samtak sigur, at í øðrum lagi kunnu arbeiðsgevararnir broyta fiskavirkisskipanina soleiðis, at arbeiðsfólk altíð eru tryggjað 40 tíma viku. Rokningina fyri meirkostnaðin kann arbeiðsgevarin rinda, tí arbeiðsgevarin er tryggjaður støðuga arbeiðsmegi á sínum vinnuvirki.

Hvør arbeiðstími telur

Samtak sigur, at ógvusligi prísvøksturin rakar tímalønt arbeiðsfólk ógvuliga hart, og hvør arbeiðstími telur fyri at fáa endarnar at røkka. 

Í staðin fyri at taka fiskavirkisskipanina av, kundu arbeiðsgevararnir rindað fyrstu áttu tímarnar, so arbeiðsfólk verða tryggjað 40 tíma arbeiðsviku. 

Hetta hevði eisini gjørt, at fiskavirkisskipanin hevði verið minni brúkt, og arbeiðsgevarin verður tryggjaður fasta manning, sigur Samrtak.

Siga einki um FAS

Samtak vísir eisini á, at Vinnuhúsið sigur einki um FAS-skipanina. 

- Vil Vinnuhúsið eisini taka FAS-skipanina av, har reiðarí fáa skattin afturbornan, sum løntakarar við handilsskipum rinda, ella vil Vinnuhúsið bara fara eftir løntakarunum og ikki sínum egnu limum, spyr Samtak.

Meiri verður at frætta í útvarpstíðindunum klokkan 12.20.