Løgtingið viðger skúlaútbyggingar í dag

Tvær umbyggingar og útbyggingar av skúlum eru á skránni hjá løgtinginum í dag.

Landsstýrið biður tingið um 23 milliónir krónur aftrat til miðnámsskúlan á Kambsdali.

Sambært lóg frá 4.mai í fjør skuldi arbeiðið kosta 71 mió. kr. Nú verður biðið um 94 milliónir til triðja byggistig á Kambsdali.

Prosjektering, ráðgeving og innbúgv eru við í báðum førum.

Hækkingin hendir eftir, at Landsverk hevur kannað tilboðini upp á arbeiðið. Kostnaðarmetingin í fjør var ov lág er niðurstøðan.

Óvissa á byggimarknaðinum

Óvissa á byggimarknaðinum hevur hækkað prísirnar, stendur í uppskotinum um verklagslóg.

Frá 2018 til 2022 eru brúktar 7,8 mió. kr. til fyrireiking og prosjektering.  Í ár eru játtaðar 12,2 mió. kr., 8,3  mió. kr. eru  fluttar frá í fjør.

Í 2024 skulu játtast 49,2 mió.kr. og síðani 16,5 mió.kr. í 2025.

Landsstýrið biður eisini um 25 milliónir krónur at út- og umbyggja eftirskúlan Rásina í Saltangará.

Tvískattaavtalur og landsroknskapur

Sambandsflokkurin biður løgtingið heita á landsstýrið um at siga, hvussu vit fáa fleiri tvískattaavtalur fyri handilsflotan og shippingvinnuna.

Og løgtingsgrannskoðararnir hava biðið løgtingið samtykkja landsroknskapinum 2021.

Løgtingsgrannskoðararnir hava sum vant nógvar atfinningar um umsitingina ella, heldur um vantandi umsiting, hjá landsstýrinum.

Tingfundurin í dag er kl.13.00.