FMA 2023: Marius eigur ársins lag

Tað er í kvøld, at føroyski tónleikurin av álvara verður fagnaður.

Til stórsligið tiltak í Norðurlandahúsinum eru fangandi framførslur á skránni, umframt at bestu avrikini í føroyska tónleikaheiminum verða heiðrað. 

Ársins lag: "Síggja av nýggjum"

Í februar gav Marius Ziska út lagið "Síggja av nýggjum", sum var fyrsta staklagið av nýggjastu útgávuni sum eitur "Rúm", sum var útgivin í gjár. 

Seinastu mongu árini er bólkurin Marius Ziska vorðin ein av Føroya kendastu bólkum. Herfyri spældi bólkurin eina útselda konsertrøð saman við Føroya Symfoniorkestri í Norðurlandahúsinum. 

Á sanginum "Síggja av nýggjum" fær Marius Ziska hjálp frá amerikumanninum Rob Moose til strúkara partin, og hann er ikki hvør sum helst.

Rob Moose hevur samstarva við so stór nøvn sum Taylor Swift, Bon Iver, Pheobe Bridgers, Gwen Stefani, The National, Interpol og mong onnur. 

Nú er sangurin "Síggja av nýggjum", sum eisini er blivin nógv spældur á føroysku útvarpsrásunum og hevur 25.000 spælingar, kosin sum ársins lag 2023.