Eykajáttan til at viðgera sjúklingar uttanlands

Játtanin til at viðgera sjúklingar uttanlands í ár røkkur ikki, og tí hevur Karsten Hansen, landsstýrismaður í heilsumálum, biðið løgtingið um 7,5 mill. kr. í eykajáttan.

Umbønin er útreiðsluneutral, tí peningurin verður tikin av játtanini Apoteksverkið.

Karsten Hansen, landsstýrismaður, sigur, at skal játtanin til serviðgerð uttanlands veitast sum partur av vanligu heyst-eykajáttanini, kann november mánaður verða liðin, áðrenn tingið hevur avgreitt málið.

Fyri at sleppa sjúklingum undan avmarkingum so leingi, biður Heilsumálaráðið um eykajáttan nú, so hon kann avgreiðast skjótari enn vanligt.