Atkvøða um hjálparpakka í dag

Øll trivnaðarnevndin tekur undir við uppskotinum hjá landsstýrinum um hjálpartiltøk í sambandi við prísvøksturin.

Málið kemur til aðru viðgerð í dag, og tá verður eisini atkvøtt í málinum.

Sirið Stenberg, landsstýriskvinna í almanna- og mentamálum, hevur skotið upp at veita fíggjarligan stuðul upp á 12.000 kr., sum verður goldin eina ferð.

Harumframt hækkar vanliga familjuískoytið frá 1. juni til 31. desember 2023 við 750 kr. fyri hvørt barnið, soleiðis at barnafamiljur við lágum inntøkum, og sum ikki hava ognir, fáa eyka fíggjarligan styrk. 

Gerandisvørur framvegis dýrar

Hjálparískoytið er ikki treytað av, at húskið hevur útreiðslur til olju at hita bústaðin.

Landsstýrið sigur, at oljan er ikki longur so dýr, sum hon hevur verið, men gerandisvørur eru framvegis dýrar.

Harumframt er markið fyri inntøku hækkað úr ávikavist 390.000 og 410.000 kr. upp til 440.000 kr., og hjá persónum yngri enn 23 ár er ogn upp til 50.000 kr. undantikin.

Taka uppskotið aftur

Sambandsflokkurin hevur lagt líknandi uppskot fram. Tað er eisini til viðgerðar í trivnaðarnevndini.

Helgi Abrahamsen, næstformaður í Sambandsflokkinum, sigur við útvarpið, at tá ið uppskotið hjá samgonguni verður samtykt, fer flokkurin at boða frá, at hann fer at taka sítt uppskot aftur.