Ráðført seg við uttanlandsnevndina um herskipavitjanir

Høgni Hoydal, landsstýrismaður í uttanríkis- og vinnumálum, hevur í dag ráðført seg við uttanlandsnevndina, hvussu føroyskir myndugleikar viðgera umbønir frá herskipum at koma í føroyska havn.

Hesa vikuna koma fimm herskip úr Noregi, Týsklandi, Belgia og Niðurlondum á Havnina.

Tvey av skipunum eru komin, og hini koma eftir ætlan í morgin og mikudagin.

Talan er um ein minuruddarabólk undir NATO, Standing NATO Maritime Mine Countermeasure Group One.

Bólkurin hevur verið í Noregi, og er á veg suðuryvir, nú steðgað verður í Føroyum.

Diplomatisk loyvi til slíkar vitjanir eru treytað av, at skipini ikki hava evnafrøðilig, lívfrøðilig, geislavirkin ella kjarnorkuvápn ella lutir til slík vápn umborð, sigur Uttanríkis- og vnnumálaráðið.

Vitjanin skuldi eftir upprunaligu ætlanini vera seinni í vikuni, men fyri veður er hon framskundað, og varir helst til mánadagin 27. mars.